شنو كاتعرف على المخدرات الرقمية !

janvier 12, 2017


  • أشنو هيا و كيفااش بدات ?!

المخدرات الرقمية أو "Digital Drugs" أو "iDoser" هي واحد الصوت فشكال كاتسمعو مللي كادير الكيت "السماعات" و كاتغطي عينيك و كاترخااا، هاد العجب كايتم عبر بث صوت عندو تردد معين في الأذن اليمني مثلا و صوت عندو تردد أقل أو أكثر في الاذن اليسرى. بانت "المخدرات الرقمية"، على تقنية قديمة كاتسمى "النقر بالأذنين"، اكتشافها العالم الألماني الفيزيائي "هينريش دوف" عام 1839، و اتستعملات لأول مرة عام 1970 لعلاج بعض الحالات النفسية للي عندهوم الاكتئاب و ماكايبغيوش يتعالجو بالأدوية، ولهذا اختارعو العلاج عن طريق تذبذبات كهرومغناطيسية، لفرز مواد منشطة للمزاج.

موسيقى "المخدرات" استعملوها في سبيطارات الحماق، حيت كايكون عندهوم خلل و نقص في المادة المنشطة للمزاج، و داكشي لاش كايحتاجوا لاستحداث الخلايا العصبية و إفرازها، و لكن داكشي كايكون باشراف طبي و ماكاياخد الا ثواني قليلة أو حتا جزء من الثانية، بشرط ماتكونش كثر من جوج مرات في النهار. و تحبس العلاج بهاد الطريقة ديك الساعة نظرًا للكلفة ديالها العالية.

  • كيفاش كاتخدم ?!

الدماغ ديالنا كايحاول أنو يوحد جوج موجات صوتية عندهوم تردد مختلف بين الأذن اليمنى واليسرى باش يحصل على مستوى واحد للصوتين، و داكشي للي كايخلي الدماغ في واحد الحالة غير مستقرة على مستوى الإشارات الكهربائية اللي يرسلها و من هنا كايختار البزنازة ديال هاد المخدرات، نوع المخدر للي بغيتيه.

البزنازة الرقميين بعدما درسو الدماغ و طبيعة الموجات الكهربائية للي كاينتجها الدماغ كل مرة تعاطى فيها المدمن المخدرات الواقعية، يمكن ليهوم يعرفو حالة النشوة المرغوبة، حيث كل نوع من المخدرات الرقمية يمكن لو يستهدف نمط معين من النشاط الدماغي، مثلا مللي كاتسمع ترددات الكوكايين لبضع دقائق، الدماغ كايتحفز بنفس الصورة للي كايتحفز بيها منين كاتعاطى للمخدر الأصل فالواقع.

  • الأنواع ديالها

هاد المخدرات بحالها بحال التقليدية، كل مخدر الا و عندو تردد ديالو، بحال الكوكايين و الهروين و الحشيش و الميثامفيتامينات و الماريوانا، .. و غيرها من أنواع المخدرات، منها للي كاتعطي المدمن مفعول الهلوسة أو للإسترخاء، أو التركيز …

  • تأثيرها

للي جربو هاد النوع من المخدرات تقسمو على جوج، كاين للي كايقول إنها عندها فاعلية كبيرة، إلا درتي بشروطها، في حين أن القسم الأخر كايقولو أنها ماعندهاش تأثير كاع، بالعكس كايضرهوم راسهوم و وذنيهوم مللي كايساليو من الاستماع لها. و التأثير ديالها على الجسم كايكون تقريبا بحال المخدرات كايبدا الشخص بالغوات اللاإرادي و كايتشنجو العضلات ديالو. و بالنسبة للضحايا ديالها مالقيتش احصائيات متعلقة بهاد النوع من الإدمان و لكن في العالم العربي ترصدات ضحية وحدة فالسعودية و لكن وزارة الصحة كاتنفي الخبر و الله أعلم.

  • شروط استعمالها

كاينين شروط ضرورية باش تحس بالمفعول التام ديال هاد المخدر،أولا خاصك تكون فشي بيت مظلم و تنعس مرخي كاامل و دير الكيت و تغمض عينيك بشي فوطة و لا ثوب و طلق الموسيقى، و كاين للي كايقول إنو خاصك ضروري تشرب الما بعدا و بزااف ديال الشروط للي غير كايكون مبالغ فيها و صافي.

  • فين غاتلقاها

كاينين مواقع متخصصة و خصوصا فالديب ويب "الويب العميق"، كاتبيع هذه النغمات في الانترنيت و كايوصل الثمن ديالها ما بين 3$ حتا ل 30$، و ماكاينة حتا شي رقابة رسمية أو حظر لهاد النغمات في الوقت الحالي، و تقدر تلقاهم عاوتاني حتا فيوتيوب و فابور.

You Might Also Like

0 تعليقات

Popular Posts

Like us on Facebook

3efrit blogger

فريق موضوع