شنو كاتعرف على السيليكا جيل؟

avril 01, 2017


كلنا شرينا سبادري و لا سباط و لا حتا الاجهزة الالكترومنزلية و لقينا لداخل واحد الخنيشة فيها شي حبيبات بحال ديال الزاج! واش عمرك سولتي شنو داكشي؟ و علاش كاتكون في هاد الحوايج الجداد بالضبط؟
هاديك كاتسمى السيليكا جيل للي هيا شكل من أشكال ثنائي أكسيد السيليكون، الصيغة الكيميائية ديالو SiO2، تصنعات من سيليكات الصوديوم، هو معدن طبيعي كايتنقا و كايتعالج و كايتحول في الاخير لحبيبات، هاد الحبيبات فيها مسام (ثقب مجهرية) متوسط الحجم ديالها هو 2.4 نانومتر. كان أول ظهور لهاد المادة سنة 1640م، و سنة 1918 خدا "والتر باتريك" براءة اختراع التوجيه الإصطناعي لصناعة السيليكا جيلفي جامعة هوبكنز و من بعد تستعملات في الحرب العالمية الأولى باش تمص الغازات السامة في الاقنعة ديال الجنود.

السيليكا جيل مادة مجففة الهدف ديالها انها تمص بخار الماء و كاتكون في المنتجات ديال الجلد و بعض الاطعمة حيث كاتمنع الرطوبة و التعفن و التلف، و كاتكون ثاني في الاجهزة الإلكترونية حيث كاتمنع التكثيف للي كايخرج على الأجهزة، و كايشكل عنصر مهم في حماية المحولات الكهربائية من الرطوبة (صحاب الالكتريسيتي غايفهموني..)، بلا مانساو الغلاقات ديال بعض الادوية كاتكون فيهوم و كانو واليدينا كايقولو لينا را السم هدااك لكن في الحقيقة حيث دوك الادوية كايحتاجو يكونو في بلاصة باردة و يمكن يسبب تحويل الدواء من مكان جاف لبارد لتكثيف بخار الماء و يخسر الدوا.
إذن السيليكا جيل كايكون في أي حاجة كاتأثر بالرطوبة.

قلنا ان السيليكا جيل كايمنع الرطوبة، لأنه كايتميز بنفاذية عالية من خلال المسام للي فيه، داكشي للي كايخليه يمتص حتا ل 40% من الوزن ديالها ماء، و بمجرد ما كاتشبع بالرطوبة كايتم تسخينها على درجة حرارة 150 حتا ل 300 درجة مئوية باش يتبخر الماء للي فيها و كاتعاود تستعمل مرة أخرى.


You Might Also Like

0 تعليقات

Popular Posts

Like us on Facebook

3efrit blogger

فريق موضوع