كيفاش كايتم إقصاء الجاذبية عل الأرض؟

juin 04, 2017

كيفاش كايتم إقصاء الجاذبية عل الأرض؟


شحال من مرة كانشوف مشهد من تدريبات وكالة ناسا على انعدام الجاذبية! و لكن ديما كانقول مع راسي كيفاش قدرو يصايبو مكان مافيهش الجاذبية؟ كيفاش قدرو يخرقو قانون الجاذبية في الفزياء؟

أول حاجة, انعدام وزن واحد الجسم لا يعني ان قوة الجاذبية الأرضية ماكاتطبقش عليه بل العكس تمااما فهي الوحيدة للي كاتطبق عليه.

 يمكن تحقق هاد الظاهرة من خلال جعل الطائرة في حالة سقوط حر, و بالتالي فكل من الطائرة و الركاب كايكونو في حالة سقوط حر، يعني كايتحركو بنفس التسارع و حيث عندهوم نفس السرعة البدئية فإن خلال السقوط غايبقا الركاب و الطائرة محافضين على نفس المسافة بيناتهم و كاينعادم ضغط الركاب على الطائرة, و هو للي كايخلي الركاب يحسو بفقدان الوزن او "انعدام الجاذبية". و باش تزيدو تفهمو شوفو هاد التجربة

نفس المبدأ كاتطبقو مراكز الابحاث في العديد من الدول باستعمال طائرة خاصة لهاد النوع ديال التجارب كاتسمى أيرباص (A300 Zero-G). كاتقوم الطائرة بمناورات كاتألف من عدة مراحل باش تحقق المسار المنحني. في اللول كايكون الطيران أفقي و كايتم التحضير لرحلة المسار المنحني من خلال زيادة السرعة حتى 810 كلم/ساعة حيث هي السرعة القصوى لمثل هاد النوع ديال الطائرات, من بعد كاتاخد الطائرة زاوية 45 درجة صعودا, حتا كاتوصل لأكثر من 6000 متر, كايتم خفض المحركات و كاتوللي الطائرة قذيفة حرة. و بالتالي كانرجعو للهضرة للي قلنا في اللول, الركاب و الطائرة في حالة سقوط حر ضمن ظروف قريبة من انعدام الجاذبية (±0,05 من تسارع الجاذبية الأرضية g), مللي كاتوصل الطائرة لدرجة انحراف كاتساوي 45 درجة نحو الاسفل كايزيد الطيار للمحركات باش يعطي سرعة للطائرة باش ترجع لحركة الصعود. و كاتكرر هاد العملية تقريبا 30 مرة في كل رحلة طيران. لكن المشكل في هاد النوع ديال التجارب ان المدة للي تقدر تحس بانعدام الجاذبية ماكايفوتش 25 ثانية. 

كاتسمح هاد الرحلات باختبار بعض الانظمة و تدريب رواد الفضاء قبل ما يسيفطوهوم للفضاء, و اجراء التجارب العلمية بكلفة أقل من اجرائها في الفضاء.

You Might Also Like

0 تعليقات

Popular Posts

Like us on Facebook

3efrit blogger

فريق موضوع