قصة نجاح نيستليه Nestle

juin 28, 2017

"نيستليه" Nestle واحد من أكبر الشركات للي استولات على المنتوجات الغذائية في العالم، منتجاتها كاتصدر لأكثر من 100 دولة في مختلف دول العالم. عندها مورد بشري كايقدر بأكثر من 300,000 عامل في العالم منها 9000 عامل في الشرق الأوسط و شمال أفريقيا، عندها 16 معمل في 13 دولة في الشرق الأوسط و شمال أفريقيا و 480 مصنع في 118 دولة عبر العالم. هادشي ماشي عجيب و خصوصا مع شركة كبيرة بحال نيستليه و لكن المميز فهاد الشركة هو قصة النجاح ديالها.
هنري نستليه Henri Nestle، تزاد في مدينة فرانكفورت في ألمانيا سنة 1814، من أب اسمو "يوهان اولريش ماتياس نستليه" و الام ديالو سميتها "آنا ماريا كاثرينا"، عندو 13 أخ و كان هو 11 و أغلبهم ماتو في الصغر، هنري في اللول تبع التقاليد ديال واليديه و خدم في الزجاج، مللي اصبح في عمر 22 سافر لمدينة فيفي السويسرية و تماك درس الكمياء و تخصص في علم الصيدلة للي موراها خدم كمساعد فواحد الصيدلية. و كان الإسم ديالو هو "هاينرش" و لكن حيث مدينة فيفي السويسرية كاتكلم الفرنسية كان كايصعب النطق ديالها لذا غيرو ل "هنري"، و مات سنة 1890 بعد ما كان كايعاني من مرض القلب.
هنري نيستليه كان عندو مصنع صغير كايخدم فيه، واحد النهار سمع بقصة واحد الطفل ديال الجيران كايعاني من سوء التغذية حيث ماكانش كايبغي يرضع الحليب ديالو مو، تأثر بزااف بهاد القصة و فكر أنه يصنع حليب بديل من حليب البقر و الدقيق و السكر، في اللول تعرض لإنتقاد كبير حيث جاتهم صعيبة يتقبلو يكون شي جليب بديل لحليب الأم.
1867 و بعد عدة محاولات قدر هنري يصنع الحليب البديل و به قدر ينقد أول طفل كان كايقولو عليها الأطباء حالة ميؤوسة منها، و تماك تقدم هاد الاختراع و تلقا إقبال كبير آنذاك، أسس شركة سماها "Afrine Lactee Nestle" و كان الشعار ديالها هو عش الطيور للي كايدل على معنى الامومة و الحب و الحنان.
1875 قرر هنري يبيع الشركة ديالو بعدما كانت منافسة شرسة بينو و بين "تشارلز بيج" منذ العام اللول ديال إنشاءها و كان الشاري هو "جول مونيرا" بثمن مليون فرنك سويسري، بطبيعة الحال هاد الثمن فداك الزمان كان ساوي. و في المقابل أعلن هنري تيسلتيه على التقاعد ديالو في سن 61 سنة.
المدير الجديد ماكانتش المهمة ديالو ساهلة مع وجود تشارلز بيج للي دامت المنافسة بيناتهم لما يقارب 30 سنة و في الاخير في سنة 1906 اتفقوا باش يضموا الشركات ديالهم و يسميوها "نيستليه" و بدات كاتنتج الحليب الجاف بالإضافة للشوكولا، و مع بداية 1907 بدات الشركة في توسيع نطاقها و فتحات مصانع في استراليا و سنغافورة و هونغ كونغ و بومباي، و لكن غاتجي مرحلة الحرب العالمية الاولى و غاتأزم الوضع لقلة مصادر الحليب و المواد الخام. و هنا فكروا يتحولوا لسوق بعيد على الحرب و كانت الوجهة هي الولايات المتحدة و تماك تزاد انتاج الشركة ضعف داكشي للي كان قبل لكن أزمة الحرب العالمية كانت باينة على الاقتصاد العالمي و كان نقص في الطلب على منتجات الشركة.
و في سنة 1929 غاتمكن الشركة انها تنقذ راسها و تخلص الديون للي عليها، حتى قدرات أنها تشري شركتي "كلير" و "سويس جنرال" للي كانو متخصصين في الشوكولا بالحليب و دمجوهوم تحت اسم نيستليه. بدات الشركة كاترجع القوة ديالها و طرحات مجموعة من المنتجات الجديدة و من بينها أول قهوة سريعة التحضير و هي "نيسكافي" للي صبحات أكثر المنتجات استهلاكاً، بالإضافة لمجموعة من المنتجات الغذائية للي تميزات بيها و للي جعلاتها من أكبر الشركات العالمية.




You Might Also Like

0 تعليقات

Popular Posts

Like us on Facebook

3efrit blogger

فريق موضوع